काठमाडौँ । नेपाली कांग्रेसका मुख्य तीन भ्रातृ संस्थामा अहिले ‘टीके नेतृत्व’ छ । विद्यार्थीहरूको नेतृत्व गर्ने नेपाल विद्यार्थी संघ (नेविसंघ), तरुण युवाहरूको नेतृत्व गर्ने नेपाल तरुण दल र महिलाहरूको नेतृत्व गर्ने नेपाल महिला संघमा पार्टीले ‘टीका’ लगाएर बनाएका अध्यक्ष छन् ।
बिज्ञापन
कांग्रेस सभापति शेरबहादुर देउवाले केन्द्रीय कार्यसमितिको निर्णय बमोजिम २०७८ चैत ९ गते नेविसंघ अध्यक्षमा दुजाङ शेर्पालाई र तरुण दलको अध्यक्षमा विद्वान गुरुङलाई अध्यक्ष बनाएका थिए । त्यस्तै २०७९ साउन २६ गते उषा मिश्र राउतलाई महिला संघको अध्यक्ष बनाएका थिए ।
बिज्ञापन
उनीहरूलाई चैत मसान्तसम्म महाधिवेशन गरिसक्न सहजीकरण गरिदिन कांग्रेसले गत असोज १६ गते निर्देशन समिति बनाएको छ ।
नेविसंघको महाधिवेशन सम्पन्न गर्न सहमहामन्त्री किशोरसिंह राठौरको संयोजकत्वमा केन्द्रीय सदस्यहरू राजीव ढुंगाना र प्रतिमा गौतमलाई निर्देशन समितिको सदस्य बनाइएको छ । तरुण दलको महाधिवेशन सम्पन्न गर्न सहमहामन्त्री महालक्ष्मी उपाधयाय ‘डिना’को नेतृत्वमा रहेको निर्देशन समितिमा केन्द्रीय सदस्यहरू सरिता प्रसाईं र जीतजंग बस्नेतलाई सदस्य बनाइएको छ । महिला संघमा पार्टी प्रवक्ता डा. प्रकाशशरण महतको नेतृत्वमा केन्द्रीय सदस्यहरू पुष्पा भुसाल र रुक्मिणी कोइरालासहितको निर्देशन समिति बनाइएको छ ।
बिज्ञापन
गत फागुन १ गते केन्द्रीय कार्यालय सानेपामा बसेको कांग्रेस पदाधिकारी बैठकमा निर्देशन समितिका संयोजक र सदस्यहरूले पार्टीले दिएको समयमा महाधिवेशन सम्पन्न गर्न गाह्रो रहेकाले केही समय बढाउन आवश्यक रहेको राय राखेका थिए । तर, कांग्रेसका पदाधिकारी र भ्रातृ संस्थाका निर्देशक समिति संयोजकबिच तयारीका विषयमा भएको छलफलमा पटक–पटक म्याद थप्दा पनि महाधिवेशन हुन नसकेको भन्दै चैत मसान्तभित्रै जसरी पनि गर्न निर्देशन दिइएको बैठकपछि पार्टी प्रवक्ता डा.प्रकाशशरण महतले सञ्चारकर्मीहरूलाई जानकारी दिएका थिए ।
छलफलमा सभापति देउवाले म्याद थप नगर्ने र तोकिएकै समयमा अधिवेशन सम्पन्न गर्न निर्देशन दिएको महतको भनाइ थियो ।
तर, ‘महाधिवेशन केन्द्रीय निर्देशन समिति’लाई पार्टीले दिएको समय गुज्रिन पाँच दिनमात्रै बाँकी रहँदासम्म कुनै पनि भ्रातृ संस्थाका तदर्थ समितिले महाधिवेशन सम्पन्न गर्ने सम्भावना देखिन्न ।
तरुण दलको महाधिवेशन केन्द्रीय निर्देशन समितिकी संयोजक कांग्रेस सहमहामन्त्री उपाध्यायले पार्टीले दिएको समयमा महाधिवेशन सम्पन्न हुने सम्भावना नदेखिएको जानकारी दिइन् । ‘तरुण दलमा तल्लो तहसम्म ७४ जिल्लाले पूर्णकालीन सदस्यताको फाराम लगिसकेका छन् । केही जिल्ला संयोजकहरूले पूर्णकालीन सदस्यता बाँड्न सुरु नै नगरेको जानकारी आएको छ । कतिपय जिल्लाले भने राम्रो गरेका छन्,’ सहमहामन्त्री उपाध्यायले रातोपाटीसँग भनिन्, ‘महाधिवेशन गर्नेबारे कसरी अगाडि बढ्ने भन्ने विषयमा पार्टीसँग छलफल गर्छौं ।’
उनले चैत मसान्तसम्म वडा र पालिकासम्मको अधिवेशन सम्पन्न गर्नका लागि तरुण दलको केन्द्रीय समितिले काम गरिरहेको बताइन् ।
नेविसंघमा भने महाधिवेशनका लागि आवश्यक पर्ने सदस्यता वितरण र नवीकरणको काम पनि सुरु भएको छैन । अध्यक्ष शेर्पाले सदस्यता वितरण तथा जिल्ला अधिवेशन सम्पन्न गर्न एकलौटी रूपमा केन्द्रीय प्रतिनिधि तोकेको भन्दै इतर समूहका नेता डा. शेखर कोइरालाको समूहको नेतृत्व गर्ने केन्द्रीय सदस्य प्रेमिका राना मगरले समानान्तर केन्द्रीय प्रतिनिधि तोकेपछि महाधिवेशनका गतिविधि ठप्प छन् । राना मगरले गत पुस ५ गते समानान्तर केन्द्रीय प्रतिनिधि खटाएपछि नेविसंघका महाधिवेशनसम्बन्धी गतिविधि ठप्प छन् ।
