काठमाडौं । राजा पुनःस्थापनाको मागसहित भएको हिंसात्मक आन्दोलनका क्रममा राष्ट्रिय स्वतन्त्र पार्टी (रास्वपा) का नेता डा. राजकुमार राई पक्राउ परेका छन्।
बिज्ञापन
काठमाडौंको तीनकुनेमा राजावादीहरूले आयोजना गरेको प्रदर्शनका क्रममा आपराधिक गतिविधिमा संलग्न भएको आरोपमा उनलाई प्रहरीले नियन्त्रणमा लिएको हो। रास्वपाको खोटाङ निर्वाचन क्षेत्र समिति संयोजकसमेत रहेका राई राप्रपाका केही नेताहरूसँगै पक्राउ परेका हुन्। प्रहरीका अनुसार, उनीमाथि भाटभटेनीमा भएको लुटपाटमा संलग्न रही रक्सी चोरी गरेको आरोपसमेत लागेको छ।
बिज्ञापन
राजनीतिक रूपमा उनले नेपाली कांग्रेसबाट आफ्नो यात्रा सुरु गरेका थिए, तर पछि रास्वपामा आबद्ध भएका थिए। अमेरिकाबाट पिएचडी गरेका राई सिसिआरसी कलेजका निर्देशकसमेत रहेको बताइएको छ।
उक्त प्रदर्शनमा हिंसात्मक झडप हुँदा दुई जनाको ज्यान गएको थियो। सोही प्रकरणमा अनुसन्धान अघि बढाइरहेको प्रहरीले ४१ जना अभियुक्तलाई म्याद थप गरी हिरासतमा राखेको थियो, जसपछि राईको संलग्नता खुलेको हो।
बिज्ञापन
खोटाङ रावाबेसी गाउँपालिका–१ निवासी राईलाई प्रहरी हिरासतमा राखेर अनुसन्धान गर्न अदालतबाट अनुमति लिइएको छ। पहिलो पटक पाँच दिनका लागि र दोस्रो पटक थप छ दिनको म्याद लिइएको प्रहरी स्रोतले जनाएको छ।
यसअघि, गएको पुस १३ गते राई रास्वपाको खोटाङ जिल्ला अध्यक्ष पदको निर्वाचनमा पराजित भएका थिए। केन्द्रीय सदस्य तोसिमा कार्कीको उपस्थितिमा दिक्तेलमा सम्पन्न जिल्ला भेलामा उनले मुकुन्दकृष्ण थापासँग पराजय भोगेका थिए।
