गत चैत ४ गते प्रहरीले काठमाडौँको टोकामा ट्रकबाट २५ करोड विदेशी मुद्रा बरामद गर्यो । प्रहरीले टोखा नगरपालिका २ झोरमा ना ७ ख १६५२ नम्बरको मालबाहक ट्रकको बोनटमाथि फल्सबटम बनाएर लुकाएको अवस्थामा अमेरिकी डलर र युरो बरामद गरेको थियो।
बिज्ञापन
ट्रकका चालक थिए-कुसाङ लामा उर्फ फुच्चे । त्यो रकमसहित भेटिएको ट्रकका चालक सिन्धुपाल्चोकको भोटेकोसी गाउँपालिका १ घर भई हाल काठमाडौँको गोकर्णेश्वर नगरपालिका २ बस्ने फुच्चे भन्ने ४३ वर्षका कुसाङ लामालाई हिरासतमा राखेर प्रहरीले अनुसन्धान गरिरहेको छ। प्रहरीले पक्राउ गर्दा फुच्चेले भनेका थिए, ‘यो पैसा मेरो होइन । मलैले एक ठाउबाट अर्को ठाउ लैजाने काम मात्र गरेको हुँ ।’
बिज्ञापन
प्रहरीको प्रारम्भिक अनुसन्धानले पनि उक्त रकम मालिक अरु नै भएको निष्कर्ष निकालेको थियो । मालिक नभेटिएपछि सामाजिक सञ्जालमा विभिन्न टिकाटिप्णी भए। एकथरिले कांग्रेस एमालेको रकम भएको आरोप लगाए भने अर्को थरिले राजावादी आन्दोलनका लागि ल्याइएको रकम भएको आरोप लगाउनसम्म भ्याए । तर, उक्त रकम नेकपा माओवादी केन्द्र निकटका व्यापारीको भएको पुष्टि भएको छ ।
उक्त रकमका मालिक सिन्धुपाल्चोकको भोटेकोसी गाउँपालिका ४ घर भई टोखा नगरपालिका १०, महादेवटार हाइटमा बस्ने नारायण पौडेल हुन् । पौडेलले सो रकम चीन पठाउन लागेको राजस्व अनुसन्धान विभागले पत्ता लगाएको हो। विभागका महानिर्देशक चण्डिप्रसाद घिमिरेका अनुसार, पौडेलले नै उक्त रकम चीन लैजान भन्दै ट्रक चालक कुसाङ लामालाई दिएका थिए। पौडेल यसअघि पनि पटकपटक पक्राउ परेका व्यक्ति हुन्।
बिज्ञापन
आफूलाई माओवादीको नेता बताउने व्यापारी पौडेल २०८० असारमा जुवाखालबाट पक्राउ परेका थिए। २१ वर्षपहिले पनि उनलाई राजस्व अनुसन्धान विभागले पक्राउ गरेको थियो। उनी रक्तचन्दनको तस्करीमा मुछिएका थिए। चीनबाट कपडाको व्यापार गर्दै आएका पौडेल पछिल्लो समय सुन तस्करीमा लागेको विभागको निष्कर्ष छ।
यसअघि पक्राउ पर्दा उनलाई छुटाउन कान्छा भाइ राजकुमार पौडेलसहित सिन्धुपाल्चोकका माओवादी नेताहरूले दबाब दिएका थिए। यिनै राजकुमार ०७४ मा भएको स्थानीय तहको निर्वाचनमा माओवादीबाट भोटेकोसी गाउँपालिकाको अध्यक्ष निर्वाचित भएका थिए। त्यतिबेलैदेखि नारायण पनि माओवादीमा खुलेर लागेका थिए ।
