तारकेश्वर नगरपालिकाका मेयर कृष्ण हरी महर्जनले जनतासँग प्रत्यक्ष संवाद गर्ने अभिनव अभ्यासका रूपमा ‘चिया चर्चा’ कार्यक्रम सञ्चालन गर्दै आएका छन्। हरेक शनिबार बिहान ६ बजे तारकेश्वर नगरपालिकाको सभा हलमा आयोजना गरिने यो कार्यक्रममा नगरबासीहरू चिया पिउँदै मेयरसँग खुला रूपमा आफ्ना समस्या, गुनासा र सुझाव राख्ने गर्छन्।
बिज्ञापन
नगरपालिकाको सेवा प्रवाहलाई अझ प्रभावकारी बनाउन, जनतासँग प्रत्यक्ष छलफल गर्न र सम्भव भएसम्म तत्काल समाधान दिने उद्देश्यले मेयर महर्जनले यो कार्यक्रम सुरु गरेका हुन्। नगरबासीहरूले चिया चर्चालाई निकै सकारात्मक रूपमा लिएका छन्। नगरपालिकासँग सरोकार राख्ने विविध विषयमा सिधै जनप्रतिनिधिसँग छलफल गर्न पाउँदा उनीहरू उत्साहित देखिन्छन्। स्थानीयका, यस कार्यक्रमले सानो-ठूलो सबै विषयमा नगर प्रमुखसम्म कुरा पुर्याउने सहज माध्यम उपलब्ध गराएको छ।
बिज्ञापन
यस कार्यक्रममा नगरबासीहरूले नगरको विकास, पूर्वाधार, सेवा प्रवाह तथा आफ्ना व्यक्तिगत तथा सामुदायिक समस्या खुला रूपमा राख्न सक्छन्। मेयर महर्जन र नगरपालिकाका अधिकारीहरूले ती विषयहरूलाई गम्भीर रूपमा सुनेर आवश्यक समाधान खोज्ने प्रयास गर्छन्। साथै, नगरपालिकाले गरिरहेका तथा गर्न लागेका विकास योजनाबारे जानकारी दिने अवसरका रूपमा पनि यो कार्यक्रम उपयोगी भएको छ।
मेयर महर्जनको यो पहलले स्थानीय सरकार र जनताबीचको दूरी घटाएको छ। अन्य स्थानीय तहहरूले पनि यस्ता कार्यक्रम सञ्चालन गरेमा नागरिक सहभागिता अझ बढ्ने विश्वास गरिएको छ। ‘चिया चर्चा’ तारकेश्वर नगरपालिकाका लागि मात्र नभई अन्य स्थानीय सरकारका लागि पनि अनुकरणीय अभ्यास बन्ने देखिन्छ।
बिज्ञापन
