राष्ट्रिय सभाका दुई समितिका सदस्यहरूले बिहीबार निर्माणाधीन संसद भवनको भौतिक प्रगतिको बारेमा जानकारी लिनुका साथै स्थलगत अनुगमन तथा निरीक्षण गरेको हो ।

निरीक्षणपछि सञ्चारकर्मीहरूसँग कुरा गर्दै दिगो विकास तथा सुशासन समितिका सभापति प्रकाश पन्थले तोकिएकै समयमा निर्माणाधीन संसद भवनको काम सम्पन्न नहुने अवस्था रहेको बताए ।

बिज्ञापन

उनले चैत्र १२ गतेसम्म निर्माण सम्पन्न गर्नुपर्ने समय दिएको भएपनि समयभित्रै सम्पन्न हुन नसक्ने अवस्था अवलोकनपछि देखिएको बताए । उनले काम ढिलो भइरहेको र ढिलो हुनुमा सामान खरिद प्रक्रियादेखि आवश्यक पर्ने मजदुर काममा नखटाएको लगायतका समस्या देखिएको बताए ।

उनले २०८१ का अधिवेशनहरू नयाँ संसद भवनबाट सञ्चालन गर्नेगरी काम अघि बढाउन पनि सरकारको ध्यानाकर्षण गराए ।

उनले भने ‘संविधान जारी गरेपछि र संविधान सभा समेत बानेश्वरको आइसिसी भवनमा चलेको थियो । बाहिर राख्दा खर्च पनि धेरै नै थियो । त्यससँगै सरकारले सिंहदरबारभित्र नै संसद भवन बनाउने कुरा राम्रो पनि हो । यो भवनलाई समयमा नै सम्पन्न गर्ने कुरामा अझै तोकिएको समयमा सकिने सम्भावना छैन । चैत्रको १२ गते सम्ममा सक्ने भन्ने आयोजनाको डेट लाइन थियो । त्यसमा सकिने सम्भावना छ की छैन र त्यसमा केके सम्भावनाहरू छन् भनेर हामीले आयोजनाकै तर्फबाट यसका प्रतिवेदनहरूमा हामीले छलफल पनि गरेका छौँ । त्यसपछि हामीले स्थलगत रुपमा नै समस्या के रहेछन् भनेर अवलोकन गरेका छौँ । दिगो विकास तथा सुशासन समिति र प्रत्यायोजित व्यवस्थापन तथा सरकारी आश्वासन समितिको तर्फबाट अनुगमन गरेका छौँ । तोकिएको समयभित्र सकिने सम्भावना छैन । काम ढिलो नै भइरहेको छ । खरिद प्रक्रियादेखि सामान ल्याउने बारेमा समस्या भएको र कामदार आवश्यक नलगाएको भन्ने समस्या देखियो । सरकारले विशेष चासो राखोस् । २०८१ का अधिवेशनहरू यहीँबाट सञ्चालन हुनेगरी तयारी गर्न सरकारको ध्यानाकर्षण गराउँछौँ ।’

अनुगमनका क्रममा सहरी विकास तथा भवन निर्माण विभागका उपमहानिर्देशक मचाकाजी महर्जनले निर्माणाधीन संसद भवनको स्ट्रक्चरको काम सकिसकेको बताए । उनले असार मसान्तसम्म इन्टेरियरको काम सकिसक्ने बताए ।

उनले भने ‘अहिलेको अवस्था भनेको स्ट्रक्चरको काम सकिसकेको अवस्था छ । मुख्य संरचना भनेको प्रतिनिधि सभा र राष्ट्रिय सभा हो । त्यसको छानाको काम थियो, त्यो सकिसकेको छ । छाने छाउने काम थालिसकेका छौँ । त्यो सकिएपछि हलभित्रको डेकोरेशनको काम सुरु हुन्छ । असार मसान्तसम्म इन्टेरियरको समयावधि दिएका छौँ । त्यो सम्मा मुख्य संरचनाहरू सकिनेछन् । आउँदो वर्षे अधिवेशनलाई लक्षित गरी काम अघि बढाइएको छ ।’

उनले आगामी वर्षे संसद अधिवेशनलाई लक्षित गरी काम भइरहेको बताए