सल्यान,
१ करोड ८७ लाख रुपैयाँको लागतमा निर्माण सम्पन्न सानागाँडाकोट लिफ्ट खानेपानी तथा सरसफाइ आयोजना आज नगर प्रमुख जनकराज गौतमले एक भव्य समारोहका बीच उद्घाटन गरेका छन्।
कार्यक्रममा उप–प्रमुख सुम्निमा डी.सी. वली, वडा अध्यक्ष प्रेमबहादुर डाँगी, वडा सदस्य, सुस्वा इकाई प्रमुख बिरेन्द्र जोशी, प्राविधिक एवं उपभोक्ता प्रतिनिधि तथा स्थानीय बासिन्दाहरूको उल्लेखनीय सहभागिता रहेको थियो।
उद्घाटनसँगै वडा नं. ७ का १५४ घरधुरी र एक सामुदायिक विद्यालयले अबदेखि प्रत्यक्ष रूपमा शुद्ध र सुरक्षित खानेपानी सेवा पाउने भएका छन्। यसले स्थानीय स्तरमा स्वास्थ्य सुरक्षा, जीवनस्तर र दैनिक सहजतामा उल्लेखनीय सुधार ल्याउने अपेक्षा गरिएको छ।
आयोजना नेपाल सरकार, बागचौर नगरपालिका, फिनल्यान्ड सरकार र युरोपियन युनियनको संयुक्त लगानीमा सम्पन्न भएको हो। परियोजनाले खानेपानी पहुँच विस्तार, सरसफाइ सुधार, र दिगो स्वास्थ्य सुरक्षामा महत्वपूर्ण योगदान पुर्याउने उद्देश्य राखेको छ।
त्यसैगरी, समारोहकै अवसरमा वडा नं. ७ का ५ वटा टोललाई पूर्ण सरसफाइ उन्मुख टोल घोषणा गरिएको छ। घर–घरमा सरसफाइ, फोहोर व्यवस्थापन, शौचालय सुविधा तथा स्वास्थ्य मापदण्ड पूरा भएको आधारमा टोलहरूलाई आधिकारिक रूपमा प्रमाणित गरिएको हो। यसले वडा नं. ७ लाई स्वच्छता र स्वास्थ्यका दृष्टिले नमूना वडा को रूपमा स्थापित गरेको छ।
नगर प्रमुख गौतमले भने,
“वडा नं. ७ मा लामो समयदेखि रहेको खानेपानी समस्या आजबाट पूर्णरूपमा समाधान भएको छ। हरेक घरधुरीले सुरक्षित र शुद्ध पानी पाउने वातावरण बनेको छ। सरसफाइमा देखिएको प्रगति अत्यन्तै उत्साहजनक छ, बाँकी कामहरू पनि छिट्टै सम्पन्न गरिनेछ।”
स्थानीय बासिन्दा र उपभोक्ता समितिले नगरपालिकाप्रति आभार व्यक्त गर्दै भने,
“वर्षौंको समस्या अन्ततः समाधान भयो। अब हामीले सुरक्षित पानी र स्वच्छ वातावरण दुवैको लाभ पाउनेछौँ। सरसफाइ अभियानलाई अझ मजबुत र दिगो बनाउन निरन्तर सहयोग गर्दै जानेछौँ।”
कार्यक्रममा आयोजना सफल बनाउन सहयोग गर्ने तथा संरचना निर्माणका लागि जग्गा उपलब्ध गराउने व्यक्तिहरूलाई नगरपालिकाले सम्मान गरेको थियो। बागचौर नगरपालिकाले यस उपलब्धिलाई स्वास्थ्य, सरसफाइ र जीवनस्तर सुधारतर्फको ऐतिहासिक कदमका रूपमा लिएको छ।
बिज्ञापन
बिज्ञापन
