सल्यान,
भैलो खेल्ने रमाइलो माहोलमा परेको एउटा घटनाले स्थानीयस्तरमा प्रहरी र नागरिकबीचको सम्बन्धबारे प्रश्न उठाएको छ। हिजो राति करिब ७:३० बजे सल्यानको खलंगामा जिल्ला प्रहरी कार्यालयका DSP डाक्टर हेम केसीको नेतृत्वमा भैलो कार्यक्रम भइरहेका बेला एक सर्वसाधारण नागरिक टेकराज शाहीले आत्म–सम्मानमा ठेस पुग्ने गरी व्यवहार भएको आरोप लगाएका छन्।
बिज्ञापन
शाहीका अनुसार, परिवारका सदस्यहरू सहित छिमेकमा भैलो हेर्न गएका बेला उनले रु. ५०५ दक्षिणा दिने निर्णय गरेका थिए। तर प्रहरी अधिकृतले उक्त रकम लिन अस्वीकार गर्दै “यस्ता ५०० लिइँदैन” भन्ने शब्द प्रयोग गर्दै सार्वजनिक रूपमा अस्वीकृति जनाएपछि आफूलाई अपमानित महसुस भएको शाहीको भनाइ छ।
शाहीले भने,
“दक्षिणा त लिनु भएन, तर सार्वजनिक रूपमा मान्छेको अपमान गर्न पाइन्छ कि पाइँदैन? दक्षिणा भन्ने कुरा मनले दिने हो। म तस्कर होइन, माफिया पनि होइन। उहाँजस्ता मान्छेबाट यस्तो व्यवहारको अपेक्षा थिएन।”
उनका अनुसार उक्त घटनाले आफ्नी १६ वर्षकी छोरीसम्ममा पनि प्रहरी प्रतिको दृष्टिकोणमा नकारात्मक प्रभाव परेको छ।
तर उनले सिङ्गो प्रहरी संगठनप्रति भने सम्मान कायम रहेको स्पष्ट पार्दै भनेका छन् —
“मैले चिनेका र श्रद्धा गर्ने प्रहरी अधिकृतहरू प्रतिको विश्वास घटेको छैन। तर नागरिकले नै भरोसा गर्ने प्रहरीबाट यस्तो व्यवहार हुँदा दुःख लागेको हो।”
स्थानीयहरूले पनि उक्त घटनालाई असजिलो रूपमा लिएका छन् र यसले “प्रहरी र जनताको सम्बन्ध सधैं संवेदनशील रहन्छ” भन्ने सन्देश दिएको टिप्पणी गरेका छन्।
बिज्ञापन
